【家鄉回憶】在長沙灣，吃開平鹹湯圓憶故人

實在我老婆外家至係
我係酷愛潮州嘅潮州姑爺

我真正嘅鄉下
係廣東省開平

同台山新會恩平合稱四邑

賣開平餸
香港好少

最近終於發現一間
開喺長沙灣長發街

可能係全港唯一開平餐廳

老闆開平新昌人
講嘢含住嚿痰咁
絕對同聲又同氣

賣皺皮腸粉鹹肉糉等家鄉嘢
最正有賣鹹湯圓

你叫老闆即搓即煮
肉片鹹雞魚餅紹菜蝦米臘腸蘿蔔絲

湯圓軟綿黏糯
湯底有臘味香

食完諗起舊陣屎

舊陣屎
老竇最愛食鄉下嘢

油糍鹹雞籠狗仔鵝黃鱔飯
當然仲有好鬼好味鹹湯圓

自從老竇仙遊
一切已成絕響

剩番呢碗鹹湯圓
憶記老爸當年情

爸爸
你好嗎
你食鹹湯圓嗎