這是一碗老派燒肉飯
來自慈雲山與黃大仙之間
一個叫鳳凰新村老小區
斜街窄巷 殘牆老窗 唐樓縱橫 車房林立
大熱天來 空氣濔漫一陣除
是五金鐵銹混和工友汗水的味道
烏煙瘴氣中 郤有一股香
遺世獨立 幾十年
鳳凰燒臘飯店
上世紀老掉牙的麻甩燒臘飯店
明檔亮着大白燈膽 十足舞台
肥雞燒鴨燒肉乳豬 就是主角
捧場觀眾 是街坊工友阿叔大嬸
個個坐到膊貼賻
人人抬頭望燒味
十足擔凳睇大戲
喂 一碗燒肉飯走色加葱油
嗨 叉鴨飯一碟要梅醬唔該
掌櫃兩姊妹 從小做到大
也沾染了剛陽氣
做嘢乾淨利落
落單斬釘截鐵
黑面不等如串串貢
大聲唔代表冇禮貌
喂 睇住 借~過~唔~該
高聲叱喝
原來剛燒好的中豬從後欄擔出來
熱辣辣的火氣沿路掃過
距離我的背脊 僅0.01公分
梗係機不可失
即刻叫碗燒肉飯
燒肉皮脆肉厚實牙實齒
飯粒飽滿軟熟新鮮熱辣
咬一塊皮扯一嚿肉扒一啖飯
那豐厚滿足感是現代唔食飯小孩永遠無發明白的
飯店那種剛陽美
也是新生代宅男港女無法欣賞的
喂 講緊張徹狄龍陳觀泰呀
你睇過未呀
原載於跟住爸爸食買玩 譚偉健
作者授權轉載
對於社區，你又無一份情呢？
歡迎將相片或文章電郵至 article@d18hk.hk