蛋撻上有昆蟲　店員：餅碎嚟㗎咋

我講咗好多次！唔好食H餅店！唔好買H餅店啲嘢！但係我個死佬就係無心裝載！

頭先老公落去買早餐畀我，點知佢買咗兩件H餅店嘅蛋撻返嚟！
佢一返嚟就話買咗H嘅蛋撻畀我食，聽到已經知瀨嘢！同佢講咗好多次好污糟咪買！
結果咪就係打開個袋望到件撻有隻昆蟲bb嘅屍骸囉！$16架！如果平都話掉咗佢算啦！
咁佢又準備返工，咪唯有自己落去退囉！
我去到H有個客喺度，個呀嬸問我想要啲乜，我已經好友善地同佢講：等你做埋個客先啦
到個客走咗我就遞嗰袋蛋撻畀個阿嬸睇

我： 頭先我老公嚟買咗兩件蛋撻呢，但係入面有隻昆蟲喺度。
( 個阿嬸對眼已經啤一啤我，望一望件撻之後好快手就搣咗隻昆蟲bb走然後同我講)

嬸： 嗰啲係餅碎嚟㗎咋，唔係昆蟲吖！你要嘅話我換過兩件俾你啦！
( 我心諗：餅碎定昆蟲邊個唔識分？你啲餅碎特別啲有腳嘅？)

我： 唔使喇唔該，我退返錢算啦。
(阿嬸一聽到我要退錢佢即刻黑曬我面，然後佢親手喺其他新鮮蛋撻度搣咗啲餅碎畀我睇， 又重複多次話係我唔識分，係餅碎唔係昆蟲， 但係你搣嗰啲餅碎啡色，隻嘢黑色㗎喎！？有腳㗎喎！？)

嬸：哎…你咁咩你唔好食啦！
(超黑面)

( 本身我keep住好好禮貌細細聲咁同佢講嘢，而當時係仲有一個男人企喺出面諗緊食乜，但個阿嬸呢句我真係唔想忍佢)
我大聲講呢句：你放心吖我不嬲唔食架

Ps： 佢全程冇抹手無洗手，希望有幫襯佢嘅人福大命大，但我絕對唔係第一次見識過呢間嘢有幾咁污糟！